Moskva, (MINA) – Moskva protjeruje više od 20 njemačkih diplomata u znak odmazde za masovno protjerivanje osoblja ruske ambasade u Berlinu, kazala je portparolka ruskog Ministarstva spoljnih poslova Marija Zaharova. Izjava Zaharove je stigla neposredno nakon što je njeno Ministarstvo osudilo, kako je rekla, još jedno masovno protjerivanje osoblja ruskih diplomatskih misija u Njemačkoj. Njemačko Ministarstvo spoljnih poslova je navelo da je primilo k znanju ruske izjave. Oni su rekli da su federalna vlada i ruska strana bili u kontaktu prethodnih sedmica što se tiče pitanja osoblja i njihovih predstavništava u inostranstvu. “Današnja događanja su dio tog procesa”, naveli su iz Ministarstva, ne govoreći konkretno o bilo kakvom protjerivanju. Moskva je optužila Berlin za kontinuirano demonstrativno uništavanje kompletnih odnosa Rusije i Njemačke. “Kao odgovor na neprijateljsko djelovanje Berlina, ruska strana je odlučila da uzvrati istom mjerom i protjera njemačke diplomate iz Rusije”, saopštilo je Ministarstvo spoljnih poslova. Moskva će ograničiti i maksimalni broj zaposlenih u njemačkim diplomatskim misijama u Rusiji, i, kako se dodaje, njemački ambasador Geza Andreas fon Gejr obaviješten je o tome 5. aprila. (kraj) tam