Frankfurt, (MINA) - Njemački parlament danas je odobrio povlačenje trupa iz vazduhoplovne baze Indžirlik u Turskoj, nakon što Ankara nije dozvolila poslanicima Bundestaga pristup svojim vojnicima koji su tamo stacionirani. Za tu odluku glasao je 461 od 569 poslanika, dok je 85 bilo protiv, a 23 uzdržana. Kako je javio Rojters, parlament je saopštio da podržava plan da se 280 njemačkih vojnika iz Indžirlika premjesti u bazu u Jordanu i očekuje da povlačenje ubrzo počne. Odluci Bundestaga prethodila je odluka njemačke vlade da trupe napuste Indžirlik. Turski predsjednik, Redžep Tajip Erdogan, je 24. maja kazao da će Turska reći Njemačkoj "doviđenja", ukoliko ta država odluči da povuče trupe iz vazduhoplovne baze "Indžirlik". Erdogan je tada, uoči odlaska za Brisel na Samit NATO, rekao da Turska nije primila ni jednu naznaku iz Berlina o mogućem povlačenju trupa stacioniranih u vazdušnoj bazi na jugu Turske. Budućnost njemačkih trupa u Indžirliku dovedena je u pitanje nakon što je Turska u maju spriječila njemačke poslanike da posjete trupe, što je navelo Berlin da razmotri njihovo povlačenje. U toj bazi nalazi se oko 280 njemačkih vojnika, koje pomažu Sjedinjenim Američkim Državama u borbi protiv Islamske države u Siriji i Iraku. (kraj) zor